شباب ڈھلتے ہی آئی پیری مآل پر اب نظر ہوئی ہے

بڑی ہی غفلت میں شب گزاری کہاں پہنچ کر سحر ہوئی ہے

ستم قیامت کے ہو رہے ہیں ہزاروں جاں اپنی کھو رہے ہیں

وہ ضد سے پھر بھی نہ باز آئے اِدھر کی دنیا اُدھر ہوئی ہے

کجا وہ شب بھر میں ختم ہونا کجا یہ جل جل کے عمر کھونا

ترے جگر سوختہ کے آگے خفیف شمعِ سحر ہوئی ہے

نہ پوچھ دامن سے تو خدارا لہو بھی شامل ہے اس میں دل کا

یہ اشک رنگیں ہیں ان سے ہمدم ابھی ابھی آنکھ تر ہوئی ہے

وہ آہِ دل سوز جوشِ غم میں جنابِ دلؔ کی جو ہم نفس تھی

جہاں جہاں اس کو آزمایا وہیں وہیں بے اثر ہوئی ہے