وصل ارزاں وقت کی لیکن فراوانی گئی

بڑھ گئی جتنی سہولت اتنی آسانی گئی

معصیت کا ذکر کیا ہے معصیت پہلے بھی تھی

رنج تو یہ ہے گناہوں سے پشیمانی گئی

عشق بھی دل سے کیا جوگی بنے وحشت بھی کی

کیا ہوا کچھ تو کہو کہا وضعِ حیوانی گئی

ایک لمبا فاصلہ ہے جان سے پہچان تک

شکل جو جانی گئی وہ بھی نہ پہچانی گئی

پہلے بھی سیلاب آتے تھے مگر کیا اس قدر

اب کے تو برسات میں ہر فصل بارانی گئی

زیرِ لب اک لفظ نے کیسا ہمیں چونکا دیا

پل ہی پل میں خانقاہیؔ سب ہمہ دانی گئی