فسانہ ہو گئے آزار دشمن کی برائی کے

لگے وہ زخم دل پر دوستوں کی بے وفائی کے

بروں سے بھی یہاں برتاؤ رکھتے ہیں بھلائی کے

بنایا با وفا اس دل کو صدقے بے وفائی کے

زمانہ کی محبت پر نہ ہو اے ہم نشین نازاں

سنائیں گے تجھے فرصت میں قصّے آشنائی کے

یہ وہ غم ہے کہ جس کی پرورش دل خوب کرتا ہے

زبان تک لا نہیں سکتا ہوں شکوے بے وفائی کے

جِلا دی دل کو میرے قلبِ دشمن کی سیاہی نے

کدورت واں بڑھی اور یاں کھلے جوہر صفائی کے

درِ تدبیر پر سر پھوڑنا شیوہ رہا اپنا

وسیلے ہاتھ ہی آئے نہ قسمت آزمائی کے

نئی تہذیب کے صدقے نہ شرمانے دیا دل کو

رہے منطق کے پردے میں کرشمے بے حیائی کے