ہر لفظ دل کا ترجماں ہر چہرہ آئینہ لگے

ہم خوش یقیں اتنے ہمیں ہر خواب ہی سچا لگے

میراث ہے یہ امتحاں جانِ حزیں! یہ بھی سہی

جب تشنگی حد سے بڑھے ہٹتا ہوا دریا لگے

خوابوں کی وادی میں پھرے بیتاب سی بے حال سی

پہ زندگی مجھ کو کوئی بھولا ہوا وعدہ لگے

جس بات پر ہنسنا بہت اس بات پر رونا بہت

احوال اپنا بھی ہمیں کچھ داستانوں سا لگے

ایک زرد پتے کے قریب ٹہنی پہ یہ کھلتی کلی

اس آن تو دل کو مرے ہر فاصلہ چھوٹا لگے

ایک کم سخن فرمان سا ایک ا٘ن کہا پیغام سا

مجھ کو تو سنگِ راہ تک تیرا ہی نقشِ پا لگے

ہر شخص ہی تم سا یہاں دل سے کبھی پوچھو اداؔ

یہ دشتِ شب کا راہ رو کیوں اس قدر تنہا لگے