بستیوں میں ہونے کو حادثے بھی ہوتے ہیں

پتھروں کی زد پہ کچھ آئینے بھی ہوتے ہیں

عافیت سفینوں کی سیلِ آب میں معلوم

بات یہ ہے کچھ مانجھی سر پھرے بھی ہوتے ہیں

شہرِ آشنائی کی ریت کچھ نرالی ہے

قربتوں کے پیمانے فاصلے بھی ہوتے ہیں

گود میں بیاباں کے تشنگی بھی پلتی ہے

دور تک سرابوں کے سلسلے بھی ہوتے ہیں

دشتِ شوق میں کس کو دادِ خستگی دیجئے

ہم سفر مسافر کے راستے بھی ہوتے ہیں

موجِ گل کے موسم میں موجِ خوں کے موسم تک

طے کئی غمِ دل کے مرحلے بھی ہوتے ہیں

گردِ رہ گزر تاباں تنگِ رہ گزر کیوں ہو

گرد میں چھپے اکثر قافلے بھی ہوتے ہیں