حمدنعتغزلنظمقطعاتترانےمناجاتبزم مزاحگیتادب اطفالرباعیآزاد نظم
فہرست ردیف
منتخب کلام کی ردیف کے آخری حرف کی ترتیب پر فہرست

اے سکونِ قلبِ مضطر اے قرارِ زندگی

نعت| ادیبؔ رائے پوری انتخاب| بزم سخن

اے سکونِ قلب مضطر اے قرارِ زندگی
اے امینِ رازِ فطرت اے بہارِ زندگی
تیری ہر ہر جنبشِ لب برگ و بارِ زندگی
تو دیارِ عشق میں ہے شہریارِ زندگی
تیرے قدموں کی بدولت تیری آمد کے طفیل
گلستاں ہی گلستاں ہے خار زارِ زندگی
ترا قربِ خاص پا کر تیرے دستِ پاک میں
سنگریزے بن گئے ہیں شاہکارِ زندگی
جس نے پائی تیری نسبت ہو گیا وہ ذی وقار
اے فروغِ آدمیت اے وقارِ زندگی
شاعرانِ حسنِ فطرت صاحبانِ درک و فہم
ہے قدم بوسی میں ہر اک وضعدارِ زندگی
درس تیرا ظالموں سے جنگ مظلوموں سے پیار
کتنی سادہ ہو گئی ہے رہ گذارِ زندگی
آدمی کو آدمی سے پیار کا نسخہ دیا
تو طبیبِ خلق ہے تیمار دارِ زندگی
تو نے آ کر دی نگاہوں کو بصیرت حسن کی
ورنہ تھی محدود لفظوں میں بہارِ زندگی
تو نے صحرائے تخیل میں لگائے گلستاں
اور چٹانوں سے نکالے آبشارِ زندگی
گونج اٹھے نغمے لگائی تو نے جب مضرابِ عشق
بربطِ فطرت پہ تھا خاموش تارِ زندگی
بے خبر دنیا و ما فیہا سے تو نے کر دیا
کیا شرابِ زندگی ہے کیا خمارِ زندگی
روح و جاں کی سلطنت پر حکمرانی ہے تری
ہم غلامِ عشق ہیں تو تاجدارِ زندگی
عشق کی دیوانگی کے سامنے سب ہیچ ہیں
توڑ دیتی ہے محبّت ہر حصارِ زندگی
تیرے پائے ناز کا اک لمس پا کر ہے رواں
چھن چھناتی گنگناتی جوئبارِ زندگی
تیری توصیف و ثناء و مدح سے آراستہ
ہے ادیبِؔ خوش بیاں کا نغمہ زارِ زندگی

پچھلا کلام | اگلا کلام

شاعر کا مزید کلام