پھر وہ گم گشتہ حوالے مجھے واپس کر دے

وہ شب و روز وہ رشتے مجھے واپس کر دے

آنکھ سے دل نے کہا رنگِ جہاں شوق سے دیکھ

میرے دیکھے ہوئے سپنے مجھے واپس کر دے

میں تجھے دوں تری پانی کی لکھی تحریریں

تو وہ خوں ناب نوشتے مجھے واپس کر دے

میں شب و روز کا حاصل اسے لوٹا دوں گا

وقت اگر میرے کھلونے مجھے واپس کر دے

مجھ سے لے لے صدف و گوہر و مرجاں کا حساب

اور وہ غرقاب سفینے مجھے واپس کر دے

نسخۂ مرہمِ اکسیر بتانے والے

تو مرا زخم تو پہلے مجھے واپس کر دے

ہاتھ پر خاکۂ تقدیر بنانے والے

یوں تہی دست نہ در سے مجھے واپس کر دے

آسماں صبح کے آثار سے پہلے پہلے

میری قسمت کے ستارے مجھے واپس کر دے

میں تری عمرِ گذشتہ کی صدا ہوں خورشیدؔ

اپنے ناکام ارادے مجھے واپس کر دے