گور میں یادِ قدِ یار نے سونے نہ دیا

فتنۂ حشر کو رفتار نے سونے نہ دیا

واہ اے طالعِ خفتہ کہ شبِ عیش میں بھی

وھمِ بے خوابیِ اغیار نے سونے نہ دیا

وا رہیں صورتِ آغوش سحر تک آنکھیں

شوقِ ہم خوابیِ دل دار نے سونے نہ دیا

یاس سے آنکھ بھی جھپکی تو توقع سے کھلی

صبح تک وعدۂ دیدار نے سونے نہ دیا

طالعِ خفتہ کی تعریف کہاں تک کیجے

پاؤں کو بھی خلشِ خار نے سونے نہ دیا

دردِ دل سے جو کہا نیند نہ آئی؟ تو کہا

مجھ کو کب نرگسِ بیمار نے سونے نہ دیا

شبِ ہجراں نے کہا قصۂ گیسوئے دراز

شیفتہؔ تو بھی دلِ زار نے سونے نہ دیا