حمدنعتغزلنظمقطعاتترانےمناجاتبزم مزاحگیتادب اطفالرباعیآزاد نظم
فہرست ردیف
منتخب کلام کی ردیف کے آخری حرف کی ترتیب پر فہرست

کسے خبر جب میں شہرِ جاں سے گزر رہا تھا

غزل| اخترؔ ہوشیار پوری انتخاب| بزم سخن

کسے خبر جب میں شہرِ جاں سے گزر رہا تھا
زمیں تھی پہلو میں سورج اک کوس پر رہا تھا
ہوا میں خوشبوئیں میری پہچان بن گئی تھیں
میں اپنی مٹی سے پھول بن کر ابھر رہا تھا
عجیب سرگوشیوں کا عالم تھا انجمن میں
میں سن رہا تھا زمانہ تنقید کر رہا تھا
وہ کیسی چھت تھی جو مجھ کو آواز دے رہی تھی
وہ کیا نگر تھا جہاں میں چپ چاپ اتر رہا تھا
میں دیکھتا تھا کہ انگلیوں میں دیے کی لو ہے
میں جاگتا تھا کہ رنگ خوابوں میں بھر رہا تھا
یہ بات الگ ہے کہ میں نے جھانکا نہیں گلی میں
یہ سچ ہے کوئی صدائیں دیتا گزر رہا تھا
یہ چند بے حرف و صوت خاکے مرا اثاثہ
میں جن کو غزلوں کا نام دے کر سنور رہا تھا
زمانہ شبنم کے بھیس میں آیا اور دعا دی
میں زرد رت میں جب اپنی بانہوں میں مر رہا تھا

مجھے کسی سے نقب زنی کا خطر نہیں تھا
میں اخترؔ اپنے ہی جسدِ خاکی سے ڈر رہا تھا

پچھلا کلام | اگلا کلام

شاعر کا مزید کلام