شرحِ فراق مدحِ لبِ مشکبو کریں

غربت کدے میں کس سے تری گفتگو کریں

یار آشنا نہیں کوئی ٹکرائیں کس سے جام

کس دل ربا کے نام پہ خالی سبو کریں

سینے پہ ہاتھ ہے نہ نظر کو تلاشِ بام

دل ساتھ دے تو آج غمِ آرزو کریں

کب تک سنے گی رات کہاں تک سنائیں ہم

شکوے گلے سب آج ترے روبرو کریں

ہمدم حدیثِ کوئے ملامت سنائیو

دل کو لہو کریں یا گریباں رفو کریں

آشفتہ سر ہیں محتسبو منہ نہ آئیو

سر بیچ دیں تو فکرِ دل و جاں عدو کریں

'تر دامنی پہ شیخ ہماری نہ جائیو'

'دامن نچوڑ دیں تو فرشتے وضو کریں'