تری یادوں کے حسیں پل کے سوا کچھ بھی نہیں

مرے کشکول میں اس کل کے سوا کچھ بھی نہیں

میں ہی پاگل تھا وفا ڈھونڈ رہا تھا ان میں

تری آنکھوں میں تو کاجل کے سوا کچھ بھی نہیں

کتنے ہی خوابِ مسرت کا نگر تھیں پہلے

اب تو آنکھیں مری بادل کے سوا کچھ بھی نہیں

بن کے سقراط جیو تجربہ اپنا ہے یہی

زندگی زہرِ ہلاہل کے سوا کچھ بھی نہیں

بڑھتی جاتی ہیں مری وحشتیں ہر دن معراجؔ

ایسا لگتا ہے میں پاگل کے سوا کچھ بھی نہیں