کبھی ملتا تو اپنے آپ کو تسخیر کرتے ہم

ہمیں تو آئینہ کرتا تجھے تصویر کرتے ہم

خس و خاشاک تھے تو رقصِ ہجراں سے ذرا پہلے

دلوں کے درمیاں بھی فاصلہ زنجیر کرتے ہم

نہیں ہے چشم کو اب فرصتِ نظارگی ورنہ

کبھی رستہ بچھاتے اور تجھے رہ گیر کرتے ہم

ادا ہوتا ہے خوشبو کی طرح تو غنچۂ لب سے

اگر تو خواب بھی ہوتا تیری تعبیر کرتے ہم

ہم اہلِ عشق پر ایسا بھی دور آیا محبت میں

کوئی بھی ابتدا کرتا مگر تاخیر کرتے ہم

سلیؔم اب تک تو بے ترتیب آوازوں کے جنگل سے

گزرتے آ رہے ہیں کچھ نہ کچھ تحریر کرتے ہم