نہیں یہ فکر کوئی رہبرِ کامل نہیں ملتا

کوئی دنیا میں مانوسِ مزاجِ دل نہیں ملتا

کبھی ساحل پہ رہ کر شوق طوفانوں سے ٹکرائیں

کبھی طوفاں میں رہ کر فکر ہے ساحل نہیں ملتا

یہ آنا کوئی آنا ہے کہ بس رسماً چلے آئے

یہ ملنا خاک ملنا ہے کہ دل سے دل نہیں ملتا

شکستہ پا کو مژدہ خستگانِ راہ کو مژدہ

کہ رہبر کو سراغِ جادۂ منزل نہیں ملتا

وہاں کتنوں کو تخت و تاج کا ارماں ہے کیا کہئے

جہاں سائل کو اکثر کاسۂ ساحل نہیں ملتا

یہ قتلِ عام اور بے اذن قتلِ عام کیا کہئے

یہ بسمل کیسے بسمل ہیں جنہیں قاتل نہیں ملتا