جفا صیاد کی اہلِ وفا نے رائیگاں کر دی

قفس کی زندگی وقفِ خیالِ آشیاں کر دی

یہ دل کیا ہے کسی کو امتحانِ ظرف لینا تھا

تنِ خاکی میں اک چھوٹی سی چنگاری نہاں کر دی

بھرم حسنِ حقیقت کا کوئی کھلنے نہیں دیتا

نظر جب سامنے آئی تجلی درمیاں کر دی

تِری بے مہریاں آخر وہ نازک وقت لے آئیں

کہ اپنوں کی محبت بھی طبیعت پر گِراں کر دی

اسیر آنکھیں کہاں سے سیرِ گلشن کے لئے لائیں

نظر جتنی بھی تھی صرفِ تلاشِ آشیاں کر دی

خرد کی مدتوں کی محنتوں پر گر پڑی بجلی

کسی نے ہنس کے سوئے دل نظر پھر ناگہاں کر دی

جبیں بے نور ہے میری تو کیا وہ در تو روشن ہے

کرن ہر ایک ماتھے کی نثارِ آستاں کر دی

وہی ہے مردِ رہرو خار زارِ زیست میں جس نے

ذرا آسان تر پہلے سے راہِ کارواں کر دی

وہی اک شامِ الفت حاصلِ ہستیِ ملاؔ ہے

جسے دنیا سمجھتی ہے کہ اس نے رائیگاں کر دی