حمد نعت غزل نظم قطعات ترانے مناجات بزم مزاح گیت ادب اطفال رباعی آزاد نظم

فہرست ردیف

منتخب کلام کی ردیف کے آخری حرف کی ترتیب پر فہرست

اک مئے بے نام جو اس دل کے پیمانے میں ہے

غزل| جگرؔ مراد آبادی انتخاب| بزم سخن

اک مئے بے نام جو اس دل کے پیمانے میں ہے

وہ کسی شیشے میں ہے ساقی نہ میخانے میں ہے

پوچھنا کیا کتنی وسعت میرے پیمانے میں ہے

سب الٹ دے ساقیا! جتنی بھی میخانے میں ہے

یوں تو ساقی ہرطرح کی تیرے میخانے میں ہے

وہ بھی تھوڑی سی جو ان آنکھوں کے پیمانے میں ہے

ایک ایسا راز بھی دل کے نہاں خانے میں ہے

لطف جس کا کچھ سمجھنے میں نہ سمجھانے میں ہے

یاد ایّامے کہ جب تھا ہرنفس اک زندگی!

زندگی اب ہر نفس کے ساتھ مر جانے میں ہے

ایک کیفِ نا تمامِ درد کی لذّت ہی کیا؟

درد کی لذّت سراپا درد بن جانے میں ہے

غرق کر دے تجھ کو زاہد تیری دنیا کو خراب!

کم سے کم اتنی تو ہر مے کش کے پیمانے میں ہے

پھر نقاب اُس نے الٹ کر روحِ تازہ پھونک دی

اب نہ کعبے میں ہے سنّاٹا نہ بت خانے میں ہے

منتشر کر دے اِسے بھی حسنِ بے پایاں کے ساتھ

زندگی شیرازۂ دل کے بکھر جانے میں ہے

پی بھی جا زاہد! خدا کا نام لے کر پی بھی جا

بادۂ کوثر کی بھی اک موج پیمانے میں ہے

شیشہ مست و بادہ مست و حسن مست و عشق مست

آج پینے کا مزہ پی کر بہک جانے میں ہے

بے تحاشہ پی رہے ہیں کب سے رِندانِ الست

آج بھی اُتنی ہی مے ہر دل کے پیمانے میں ہے

حسن کی اک اک ادا پر جان و دل صدقے مگر

لطف کچھ دامن بچا کر ہی گُزر جانے میں ہے

پچھلا کلام | اگلا کلام

شاعر کا مزید کلام

برابر سے بچ کر گذر جانے والے

ا ِک رند ہے اور مدحتِ سلطانِ مدینہ

نہیں جاتی کہاں تک فکرِ انسانی نہیں جاتی

جو اب بھی نہ تکلیف فرمائیے گا

جب تک کہ غمِ انساں سے جگرؔ انسان کا دل معمور نہیں