‏میرے جیسے بن جاؤ گے جب عشق تمہیں ہو جائے گا

دیواروں سے سر ٹکراؤ گے جب عشق تمہیں ہو جائے گا

ہر بات گوارا کر لو گے منت بھی اتارا کر لو گے

تعویذیں بھی بندھواؤ گے جب عشق تمہیں ہو جائے گا

تنہائی کے جھولے کھولیں گے ہر بات پرانی بھولیں گے

آئینے سے تم گھبراؤ گے جب عشق تمہیں ہو جائے گا

جب سورج بھی کھو جائے گا اور چاند کہیں سو جائے گا

تم بھی گھر دیر سے آؤ گے جب عشق تمہیں ہو جائے گا

بے چینی بڑھ جائے گی اور یاد کسی کی آئے گی

تم میری غزلیں گاؤ گے جب عشق تمہیں ہو جائے گا