اپنی کشتی توڑ دینے کی سزا پانے لگے

ہم اُدھر طوفاں اِدھر ساحل سے ٹکرانے لگے

تارکِ رسمِ جفا بھی اب ستم ڈھانے لگے

لیجئے اُتری کمانوں سے بھی تیر آنے لگے

گفتگو ہے ہوش کی اور جستجو ہے شوق کی

مجھ کو تو اہلِ خرد بھی جیسے دیوانے لگے

زلف آرامِ دل و جاں ہو کہ مرگِ ناگہاں

ایک ہی ناگن ہے جس کاندھے پہ لہرانے لگے

جادۂ غم میں مرے نقشِ قدم کو دیکھ کر

کارواں ٹھہرے ہوئے آنے لگے جانے لگے

ایک آنسو اور اس میں داستانِ صد ملال

کتنے دریا قطرۂ شبنم میں تھرّانے لگے

اپنی کمزوری بیاں کرتا ہے ہر دانش فروز

ناصحِ مشفق نہیں سمجھے تو سمجھانے لگے

روشنی کوئی ہو ہوتی ہے محبت آفریں

شمع کے پیچھے بھی ہیں دوچار پروانے لگے

نیند کیسے آئے اس رنگیں تصور میں نشورؔ

رات کو جب دل رباؤں کا خیال آنے لگے