فلک دیتا ہے جن کو عیش ان کو غم بھی ہوتے ہیں

جہاں بجتے ہیں نقارے وہاں ماتم بھی ہوتے ہیں

گلے شکوے کہاں تک ہوں گے آدھی رات تو گذری

پریشاں تم بھی ہوتے ہو پریشاں ہم بھی ہوتے ہیں

وہ آنکھیں سامری فن ہیں وہ عیسی نفس ہیں دیکھو

مجھی پہ سحر ہوتے ہیں مجھی پہ دم بھی ہوتے ہیں

طبیعت کی کجی ہرگز مٹائے سے نہیں مٹتی

کبھی سیدھے تمہارے گیسوئے پرخم بھی ہوتے ہیں

کسی کا وعدۂ دیدار تو ائے داغؔ ! برحق ہے

مگر یہ دیکھئے دل شاد اس دن ہم بھی ہوتے ہیں