اسے اپنے فردا کی فکر تھی وہ جو میرا واقفِ حال تھا

احمد ندیم قاسمی سے غلط منسوب جناب زاہد فخریؔ کی غزل*

وہ جو اس کی صبحِ عروج تھی وہ میرا وقتِ زوال تھا

مرا درد کیسے وہ جانتا مری بات کیسے وہ مانتا

وہ تو خود فنا کے سفر پہ تھا اسے روکنا بھی محال تھا

کہاں جاؤ گے مجھے چھوڑ کر میں یہ پوچھ پوچھ کے تھک گیا

وہ جواب مجھ کو نہ دے سکا وہ تو خود سراپا سوال تھا

وہ جو اس کے سامنے آ گیا وہی روشنی میں نہا گیا

عجب اس کی ہیبتِ حسن تھی عجب اس کا رنگِ جمال تھا

دمِ واپسیں اسے کیا ہوا نہ وہ روشنی نہ وہ تازگی

وہ ستارہ کیسے بکھر گیا وہ تو اپنی آپ مثال تھا

وہ ملا تو صدیوں کے بعد بھی مرے لب پہ کوئی گلہ نہ تھا

اسے میری چپ نے رُلا دیا جسے گفتگو میں کمال تھا

مرے ساتھ لگ کے وہ رو دیا مجھے فخریؔ اتنا وہ کہہ سکا

جسے جانتا تھا میں زندگی وہ تو صرف وہم و خیال تھا