ہم خلوص والے ہیں یہ بھی کر دِکھائیں گے

تہمتیں خریدیں گے خدمتیں لُٹائیں گے

یا تو ہوں گے زنداں میں یا ملیں گے مقتل میں

بزدلوں کی محفل میں ہم نظر نہ آئیں گے

اس لئے بھی اپنوں کو منہ نہیں لگاتے وہ

ننگے بھوکے رشتہ دار آئے تو ستائیں گے

اُس سے کچھ طلب کرکے ہم نہ ہوں گے شرمندہ

مہرباں نہ ہونے کا فائدہ اٹھائیں گے

چکھ لیا ہے اب ہم نے ذائقہ قناعت کا

جذبۂ ہوس تیرے ہاتھ ہم نہ آئیں گے

ائے حفیظؔ برپا ہے بزم نوجوانوں کی

لاکھ روکے بیماری ہم ضرور جائیں گے