مری زندگی ہے ظالم ترے غم سے آشکارا

ترا غم ہے در حقیقت مجھے زندگی سے پیارا

وہ اگر برا نہ مانیں تو جہانِ رنگ و بو میں

میں سکونِ دل کے خاطر کوئی ڈھونڈ لوں سہارا

مجھے آ گیا یقیں سا کہ یہی ہے میری منزل

سرِ راہ جب کسی سے مجھے دفعتاً پکارا

میں بتاؤں فرق ناصح جو ہے مجھ میں اور تجھ میں

مری زندگی تلاطم ، تری زندگی کنارا

مجھے گفتگو سے بڑھ کر غمِ اذنِ گفتگو ہے

وہی بات پوچھتے ہیں جو نہ کہہ سکوں دوبارا

کوئی ائے شکیلؔ دیکھے یہ جنوں نہیں تو کیا ہے

کہ اُسی کے ہو گئے ہم جو نہ ہو سکا ہمارا