یہ جو صہبائے دل ربائی ہے

کتنے شیشوں سے چھن کے آئی ہے

خونِ دل بھر کے جام میں رکھو

موسمِ گل کی رونمائی ہے

راہ میں بے سبب نہیں کانٹے

احترامِ برہنہ پائی ہے

گل میں رہ کر ہے بوئے گل آزاد

ہر اسیری میں اک رہائی ہے

بندگی وہ مقام ہے کہ جہاں

خود شناسی بھی خود نمائی ہے

تیرا غم درمیاں میں تھا ورنہ

زندگی کس کو راس آئی ہے

تیرے رخ کی بہار کے آگے

پھول اک کاسۂ گدائی ہے

اُس نظر کے حضور اے شاعرؔ

کچھ نہ کہنا بھی لب کشائی ہے