روشن چراغِ علم سے ہے فکر وفن کا آسماں

ترانہ کہکشاں ادارہ ادبِ اطفال بھٹکل

محوِ سفر شام و سحر اہلِ ادب کی کہکشاں

ہم دامنِ افلاک میں مثلِ شرر بے تاب ہیں

اور مطلعِ انوار پر ہر دم رواں پیہم دواں

ہم سے درخشاں طلعتیں ہم سے گریزاں ظلمتیں

ہم سے فروزاں تابشیں ہم سے ہی تابندہ جہاں

ہم سے عنادل کو ملی نغماتِ دل کی چاشنی

ہم بوئے گل جانِ چمن ہم سے بہارِ گلستاں

شیریں سخن غنچہ دہن رشکِ سمن فخرِ زمن

اخلاق کے سُونے چمن میں نکہتِ عنبر فشاں

سوزِ حیاتِ سرمدی ہے اپنا خوابِ زندگی

ورنہ فغانِ دل میں ہو پیدا سرورِ مئے کہاں

ہم بادۂِ عشقِ نبی کے کیف سے مخمور ہیں

ہم آشنائے دردِ دل سوزِ نہاں کے ترجماں

حق کے علم بردار ہیں ہم حیدرِ کرار ہیں

باطل کے لشکر کے لئے ہم مثلِ شمشیر وسناں

لرزیں گی باطل کی صفیں گونجے گی پھر حق کی اذاں

سمعانؔ کے نغمات گر ہوں گے درائے کارواں