اب عالمِ تغافلِ پنہاں کچھ اور ہے

ہر لمحہ اضطراب کا عنواں کچھ اور ہے

ہے یوں تو ہر نشاط قدم بوسِ عاشقاں

لیکن اشارۂ غم جاناں کچھ اور ہے

یہ داستاں نہیں رخ و گیسو پہ منحصر

افسانۂ جمال کا عنواں کچھ اور ہے

ہر چند جامِ مرگ بھی ہے راحت آفریں

اے دردِ زندگی تیرا درماں کچھ اور ہے

الطاف برملا کی تو کیا بات ہے مگر

رعنائیِ نوازشِ پنہاں کچھ اور ہے

بیتابیٔ خرد ہے نہ بیباکیٔ جنوں

اے دوست رازِ چاکِ گریباں کچھ اور ہے

زاہد ترا نشیمنِ ایماں بھی ہے بلند

لیکن مرا تصورِ ایماں کچھ اور ہے

بر حق مسرتِ سر و ساماں مگر روشؔ

لطفِ حیات بے سر و ساماں کچھ اور ہے