توڑ کر اٹھے ہیں جام و شیشہ و پیمانہ ہم

کس سے کہہ دیں آج رازِ نرگسِ مستانہ ہم

بجلیاں روپوش طوفاں دم بخود صحرا خموش

جا رہے ہیں کس طرف ائے لغزشِ مستانہ ہم

اور جو کچھ ہے وہ سب آرائشِ افسانہ ہے

تو ہے افسانہ ہمارا اور ترا افسانہ ہم

زندگی اک مستقل شرحِ تمنا تھی مگر

عمر بھر تیری تمنا سے رہے بیگانہ ہم

تجھ میں بھی کچھ ہوش مندانہ ادائیں آ گئیں

تجھ سے بھی اب بدگماں ہیں ائے دلِ دیوانہ ہم

خشک آنکھیں دل شکستہ روح تنہا لب خموش

بستیوں میں دیکھتے ہیں صورتِ ویرانہ ہم

ہم تک اب آئے نہ آئے دورِ پیمانہ روشؔ

مطمئن بیٹھے ہیں زیرِ سایۂ میخانہ ہم