چمن کے غنچوں نے رنگ بدلا فلک کے تاروں نے ساتھ چھوڑا

میں جن سہاروں سے مطمئن تھا انہی سہاروں نے ساتھ چھوڑا

خود اہلِ کشتی کی سازشیں ہیں کہ ناخدا کی نوازشیں ہیں

وہیں تلاطم کو ہوش آیا جہاں کناروں نے ساتھ چھوڑا

نہ خُم سلامت نہ جام باقی جھکی جھکی ہے نگاہِ ساقی

نیاز مندوں نے آنکھ بدلی وفا شعاروں نے ساتھ چھوڑا

ہوا کا رخ ہم بدل چکے تھے بھنور کی زد سے نکل چکے تھے

کہاں امیدوں کو نیند آئی کہاں سہاروں نے ساتھ چھوڑا

غمِ محبت کی داستاں بھی عجیب دلچسپ داستاں ہے

نہ ہمنواؤں نے آنکھ بدلی نہ راز داروں نے ساتھ چھوڑا

مرے گناہِ نظر سے پہلے چمن چمن میری آبرو تھی

مجھے شعورِ جمال آیا تو گلعذاروں نے ساتھ چھوڑا

مرا مذاقِ جنوں سلامت کہیں بھی تنہا نہیں رہوں گا

ہزار طوفان ساتھ دیں گے اگر کناروں نے ساتھ چھوڑا

مری شبِ غم گذر رہی ہے یقینِ محکم کے ساتھ قابلؔ

وہیں سحر بھی طلوع ہوگی جہاں ستاروں نے ساتھ چھوڑا