حمد نعت غزل نظم قطعات ترانے مناجات بزم مزاح گیت ادب اطفال رباعی آزاد نظم

فہرست ردیف

منتخب کلام کی ردیف کے آخری حرف کی ترتیب پر فہرست

رات دن چین ہم ائے رشکِ قمر رکھتے ہیں

غزل| لالہ مدھو رام جوہؔر انتخاب| بزم سخن

رات دن چین ہم ائے رشکِ قمر رکھتے ہیں

شام اودھ کی تو بنارس کی سحر رکھتے ہیں

بھانپ ہی لیں گے اشارہ سرِ محفل جو کیا

تاڑنے والے قیامت کی نظر رکھتے ہیں

ڈھونڈ لیتا میں اگر اور کسی جا ہوتے

کیا کہوں آپ دلِ غیر میں گھر رکھتے ہیں

اشک قابو میں نہیں راز چھپاؤں کیوں کر

دشمنی مجھ سے مرے دیدۂ تر رکھتے ہیں

کیسے بے رحم ہیں صیاد الہی توبہ!

موسمِ گل میں مجھے کاٹ کے پر رکھتے ہیں

کون ہیں ہم سے سوا ناز اٹھانے والے

سامنے آئیں جو دل اور جگر رکھتے ہیں

دل تو کیا چیز ہے پتھر ہو تو پانی ہو جائے

مرے نالے بھی ابھی اتنا اثر رکھتے ہیں

چار دن کے لئے دنیا میں لڑائی کیسی

وہ بھی کیا لوگ ہیں آپس میں شرر رکھتے ہیں

حالِ دل یار کو محفل میں سناؤں کیوں کر

مدعی کان اِدھر اور اُدھر رکھتے ہیں

جلوۂ یار کسی کو نظر آتا کب سے

دیکھتے ہیں وہی اس کو جو نظر رکھتے ہیں

عاشقوں پر ہے دکھانے کو عتاب ائے جوہؔر

دل میں محبوب عنایت کی نظر رکھتے ہیں

پچھلا کلام | اگلا کلام

شاعر کا مزید کلام

رات دن چین ہم ائے رشکِ قمر رکھتے ہیں