چاک گریباں دیکھ کے ہم کو لوگو کیوں حیرانی ہے

فصلِ بہاراں نام ہے جس کا فطرت کی عریانی ہے

آنکھ میں جھانکو غم کو ٹٹولو دلداری سے بات کرو

ہنستے چہرے پر مت جاؤ دل میں بڑی ویرانی ہے

پلکوں پہ کچھ تارے چمکے زخمِ تمنا جاگ اٹھا

ایسی مہکی یاد تمہاری جیسے رات کی رانی ہے

آنکھ میں مستی مدرا جیسی اور بدن ہے چندن سا

دیکھ کے سندر روپ کسی کا آنکھوں کو حیرانی ہے

چلتے پھرتے لوگوں میں اب جینے کا احساس نہیں

گاؤں کا پنگھٹ سونا سا ہے شہروں میں ویرانی ہے

کیفؔ تغیر کا قائل ہوں اور یہ میں نے سوچا ہے

حسن بھی فانی عشق بھی فانی جسم مگر لافانی ہے