فکر ہی ٹہری تو دل کو فکرِ خوباں کیوں نہ ہو

خاک ہونا ہے تو خاکِ کوئے جاناں کیوں نہ ہو

دہر میں ائے خواجہ جب ٹہری اسیری ناگزیر

دل اسیرِ حلقۂ گیسوئے پیچاں کیوں نہ ہو

زیست ہے جب مستقل آوارہ گردی ہی کا نام

عقل والو! پھر طوافِ کوئے جاناں کیوں نہ ہو

اک نہ اک ہنگامے پر موقوف ہے جب زندگی

میکدے میں رند رقصاں و غزلخواں کیوں نہ ہو

جب فریبوں ہی میں رہنا ہے تو ائے اہلِ خرد

لذتِ پیمانِ یارِ سست پیماں کیوں نہ ہو

یاں جب آویزش ہی ٹہری ہے تو ذرّے چھوڑ کر

آدمی خورشید سے دستِ گریباں کیوں نہ ہو

اک نہ اک ظلمت سے جب وابستہ رہنا ہے تو جوشؔ

زندگی پر سایۂ زلفِ پریشاں کیوں نہ ہو