حمدنعتغزلنظمقطعاتترانےمناجاتبزم مزاحگیتادب اطفالرباعیآزاد نظم
فہرست ردیف
منتخب کلام کی ردیف کے آخری حرف کی ترتیب پر فہرست

خموش بیٹھے ہو کیوں سازِ بے صدا کی طرح

غزل| آتشؔ بہاول پوری انتخاب| بزم سخن

خموش بیٹھے ہو کیوں سازِ بے صدا کی طرح
کوئی پیام تو دو رمزِ آشنا کی طرح
کہیں تمہاری روش خار و گل پہ بار نہ ہو
ریاضِ دہر سے گزرے چلو صبا کی طرح
نیاز و عجز ہی معراجِ آدمیت ہیں
بڑھاؤ دستِ سخاوت بھی التجا کی طرح
جو چاہتے ہو بدلنا مزاجِ طوفاں کو
تو ناخدا پہ بھروسا کرو خدا کی طرح
مجھے ہمیشہ رہِ زیست کے دوراہوں پر
اک اجنبی ہے جو ملتا ہے آشنا کی طرح
تمام عمر رہا سابقہ یزیدوں سے
مرے لئے تو یہ دنیا ہے کربلا کی طرح
امید ان سے وفا کی تو خیر کیا کیجے
جفا بھی کرتے نہیں وہ کبھی جفا کی طرح
یہ دہر بھی تو ہے مے خانۂ الست نما
رہو یہاں بھی کسی رندِ پارسا کی طرح

زباں پہ شکوۂ بے مہریٔ خدا کیوں ہے؟
دعا تو مانگئے آتشؔ کبھی دعا کی طرح

پچھلا کلام | اگلا کلام

شاعر کا مزید کلام