اب کسی کو ہم غریبوں کا خیال آتا نہیں

مدتیں گزریں کوئی پرسانِ حال آتا نہیں

دوستوں سے بھی محبت دشمنوں سے بھی وفا

ہم کو اس کے ما سوا کوئی کمال آتا نہیں

خشک ہو جاتے ہیں جب آنسو تو آتا ہے لہو

غم وہ دولت ہے کبھی اس پر زوال آتا نہیں

ہم فقیروں کے یہاں بٹتی ہے خیراتِ وفا

کون پھیلائے ہوئے دستِ سوال آتا نہیں

ان کے گلشن سے کبھی جاتی نہیں فصلِ بہار

اور یہاں پھولوں کا موسم کوئی سال آتا نہیں

ہم تو اس دورِ جفا میں بھی ہیں اتنے وضعدار

خواب میں بھی بے وفائی کا خیال آتا نہیں

کیسے کیسے سرخرو آتے ہیں تیری بزم میں

ہاں مرے جیسا کوئی آشفتہ حال آتا نہیں