بہار آئی ہے اب مجھ کو نکل جانا ہے گلشن سے

نگاہِ باغباں ہٹتی نہیں میرے نشیمن سے

پہنچ جاتا ہے اپنا ہاتھ خود اپنے گریباں تک

وہ ہم کو دیکھ کر جب منہ چھپا لیتے ہیں دامن سے

نشیمن میں ہمیں کیا امن کی صورت نظر آئے

دکھائی دے رہا ہو جب قفس شاخِ نشیمن سے

قفس میں ہوں مگر اس پر قناعت کی نہیں جاتی

خیال آتا ہے گلشن کا پیام آتے ہیں گلشن سے

بڑھا کر شوقِ نظارہ بڑھائی حسن کی تابش

لگائے چار چاند اس نے رخِ روشن کو چلمن سے

ترے غمزے لڑا دیں گے مسلماں کو مسلماں سے

ترے عشوے بھڑا دیں گے برہمن کو برہمن سے

ہوا ہے باعثِ تکلیف اب شغلِ سخن وحشتؔ

تعلق قطع کرنا ہی پڑے گا مجھ کو اس فن سے