حمدنعتغزلنظمقطعاتترانےمناجاتبزم مزاحگیتادب اطفالرباعیآزاد نظم
فہرست ردیف
منتخب کلام کی ردیف کے آخری حرف کی ترتیب پر فہرست

ایسے میں خاک لطفِ فراوانِ زندگی

غزل| نازاںؔ دہلوی انتخاب| بزم سخن

ایسے میں خاک لطفِ فراوانِ زندگی
دستِ قضا ہے اور گریبانِ زندگی
شاداں ہیں جس پہ حلقہ بگوشانِ زندگی
کتنا حسیں فریب تھا فرمانِ زندگی
پاسِ ادب ہے ورنہ میں کہتا یہ برملا
بخشا ہے کیا عذاب بہ عنوانِ زندگی
برہم جو تو ہوا تو بتا حسنِ مطمئن
ہوکر رہیں گے کس کے پریشانِ زندگی
فکرِ معاش ، عشقِ بتاں ، جبرِ روزگار
کس کس کے ہاتھ میں ہے گریبانِ زندگی
اک بارِ کائنات ہیں دم پر لٹے ہوئے
کتنے جری ہیں درد نوازانِ زندگی
اس کے لئے ہے محشرِ تازہ ہر ایک سانس
جس بد نصیب کو ہوا عرفانِ زندگی

یہ بزمِ دل فریب ہے کانٹوں کی رہ گزر
نازاںؔ بچا کے چل یہاں دامانِ زندگی

پچھلا کلام | اگلا کلام

شاعر کا مزید کلام