ترے کوچے کو وہ بیمارِ غم دار الشفا سمجھے

اجل کو جو طبیب اور مرگ کو اپنی دوا سمجھے

غلط فہمی ہماری تھی جو ان کو آشنا سمجھے

ہم ان کو دیکھو کیا سمجھے تھے اور وہ ہم کو کیا سمجھے

شہیدانِ محبت خوب آئینِ وفا سمجھے

بہا خوں کوئے قاتل میں اسی کو خوں بہا سمجھے

ستم کو ہم کرم سمجھے جفا کو ہم وفا سمجھے

اور اس پر بھی نہ سمجھے وہ تواس بت سے خدا سمجھے

حکایت دل کی کہتا ہوں سمجھتے ہو شکایت ہے

تمہیں سمجھو ذرا دل میں کہ سمجھے بھی تو کیا سمجھے

عدو آیا ہے بن کر نامہ بر لکھا نصیبوں کا

کریں گے لے کے خط کیا مدعی سے مدعا سمجھے

مجھے آتا ہے رشک اس رندِ مئے آشام پر ساقی

نہ جو دَع مَا کَدَر جانے نہ جو خُذ مَا صَفَا سمجھے

نہ آیا خاک بھی رستہ سمجھ میں عمرِ رفتہ کا

مگر سمجھے تو داغِ معصیت کو نقشِ پا سمجھے

سمجھ میں ہی نہیں آتی ہے کوئی بات ذؔوق اس کی

کوئی جانے تو کیا جانے کوئی سمجھے تو کیا سمجھے