کیوں شکوۂ غم اے دلِ ناشاد کرے ہے

اک غم ہی تو ہے جو تجھے آباد کرے ہے

صیّاد یہ کیا کیا ستم ایجاد کرے ہے

اب سارے گلستاں ہی کو برباد کرے ہے

کس حال میں اب ہائے وہ آزاد کرے ہے

دل قید سے چھٹتے ہوئے فریاد کرے ہے

یہ عشق تو ہر حال میں راضی برضا ہے

اب جو بھی ترا حسنِ خدا داد کرے ہے

دل محوِ محبت ہے اسے کچھ نہیں پروا

آباد کرے کوئی کہ برباد کرے ہے

پاوے ہے وہی عشق سر افرازئ عالم

جس عشق پہ وہ حسنِ ازل صاد کرے ہے

ہاں ساقیٔ کوثر سے صبا عرض یہ کرنا

اک رند سیہ مست بہت یاد کرے ہے

یہ عاشقِ بے نام ہے مشتاقِ زیارت

دن رات ترے ہجر میں فریاد کرے ہے

درویشِ زبوں حال ہے اے جانِ دو عالم

ٹوٹے ہوئے دل سے جو تجھے یاد کرے ہے

اے بادِ صبا راہ تری دیکھ رہا ہوں

اب آ کے سنا جو بھی وہ ارشاد کرے ہے

رہتا ہے نفیسؔ ان دونوں اربابِ جنوں میں

دیوانہ ہے رسوائیِ اجداد کرے ہے