حمدنعتغزلنظمقطعاتترانےمناجاتبزم مزاحگیت
فہرست ردیف
منتخب کلام کی ردیف کے آخری حرف کی ترتیب پر فہرست

ہزار دل میں مرے زخمِ انتظار آئے

غزل| نظؔر لکھنوی انتخاب| بزم سخن

ہزار دل میں مرے زخمِ انتظار آئے
خدا کرے کہ وہ اب رشکِ روز گار آئے
ہوائے دہر کسی کو نہ ساز گار آئے
یہی سبب ہے جو آئے وہ اشک بار آئے
خوشا نصیب کہ رندوں کو اذنِ ساقی ہے
پیے ہی جائیں نہ جب تک انہیں خمار آئے
اسی کی یاد ہے اب زندگی کا سرمایہ
کسی کی بزم میں جو وقت ہم گزار آئے
صعوبتوں کو بہ خندہ جبیں کیا انگیز
اسی طلب میں کہ اے کاش کوئے یار آئے
ہم آخرش کہ قیامت کی نیند سوئے ہیں
قرار اب تجھے اے چشمِ انتظار آئے
سنا جو ذکرِ بہاراں تو تیرے دیوانے
بہ چشمِ تر بہ گریبانِ تار تار آئے
مری نظرؔ سے نہ گزرو خیال میں آؤ
ہمارے دل کو کچھ اپنا بھی اعتبار آئے

پچھلا کلام | اگلا کلام

شاعر کا مزید کلام