حمدنعتغزلنظمقطعاتترانےمناجاتبزم مزاحگیت
فہرست ردیف
منتخب کلام کی ردیف کے آخری حرف کی ترتیب پر فہرست

بچھڑ گیا تھا کوئی خوابِ دلنشیں مجھ سے

غزل| شاہدؔ ذکی انتخاب| بزم سخن

بچھڑ گیا تھا کوئی خوابِ دلنشیں مجھ سے
بہت دنوں مری آنکھیں جدا رہیں مجھ سے
میں سانس تک نہیں لیتا پرائی خوشبو میں
جھجھک رہی ہے یوں ہی شاخِ یاسمیں مجھ سے
مرے گناہ کی مجھ کو سزا نہیں دیتا
مرا خدا کہیں ناراض تو نہیں مجھ سے
یہ شاہکار کسی ضد کا شاخسانہ ہے
الجھ رہا تھا بہت نقشِ اولیں مجھ سے
میں تخت پر ہوں مگر ہوں تو خاک زادہ ہی
گریز کرتے ہیں کیوں بوریا نشیں مجھ سے
اجڑ اجڑ کے بسے ہیں مرے در و دیوار
بچھڑ بچھڑ کے ملے ہیں مرے مکیں مجھ سے
بکھر رہی ہے تپِ انتقام سے مری خاک
گزر رہی ہے کوئی موجِ آتشیں مجھ سے
محال ہے کہ تماشا تمام ہو شاہدؔ
تماش بیں سے میں خوش ہوں تماش بیں مجھ سے

پچھلا کلام | اگلا کلام

شاعر کا مزید کلام