آؤ بے پردہ تمہیں جلوۂ پنہاں کی قسم

ہم نہ چھیڑیں گے ہمیں زلفِ پریشاں کی قسم

چاک داماں کی قسم چاک گریباں کی قسم

ہنسنے والے تجھے اس حالِ پریشاں کی قسم

میرے ارمان سے واقف نہیں شرمائیں گے آپ

آپ کیوں کھاتے ہیں ناحق مرے ارماں کی قسم

نیند آئے نہ کبھی تجھ سے بچھڑ کر ظالم

اپنی آنکھوں کی قسم تیرے شبستاں کی قسم

لبِ جاناں پہ فدا عارضِ جاناں کے نثار

شامِ رنگیں کی قسم صبحِ درخشاں کی قسم

آج تک صبحِ وطن یاد ہے ہم کو اخترؔ

دردِ ہجراں کی قسم شامِ غریباں کی قسم