زندگانی کو وقفِ شریعت کرو

اپنے گھرسے اندھیروں کو رخصت کرو

دشمنوں کو بھی بڑھ کر لگاؤ گلے

مصطفیٰ کی طرح سب کی خدمت کرو

اپنی اولاد کو اچھی تعلیم دو

اپنے سرمایہ کو بیش قیمت کرو

آبیاری کرو نخلِ ایمان کی

دھوپ کو سایۂ ابرِ رحمت کرو

اپنے گھر کو بھی دیکھو بقولِ نبی

اپنے ہمسایہ کی بھی اعانت کرو

تھام کر دامنِ سید الانبیاء

بندگانِ خدا کی قیادت کرو

تم زمانہ کے محبوب بن جاؤ گے

اس سراپا کرم سے محبت کرو

غیر کے سامنے کیوں جھکاتے ہو سر

اپنے اللہ سے صرف منت کرو

ہے نبی سے محبت کا دعویٰ اگر

پیش صورت نہیں اپنی سیرت کرو

چاہتے ہو جو کونین میں آبرو

پیرویٔ نبی رب کی مدحت کرو

مانگ کر سایۂ دامنِ مصطفیٰ

اس جہنم کو اعجازؔ جنت کرو