جمالِ محمدؐ سے تزئینِ عالم جمالِ محمدؐ گلستاں گلستاں

منور منور معطر معطر فروزاں فروزاں درخشاں درخشاں

نگاہِ بلالی کی تابانیاں ہوں کہ چشمِ اویسی کی حیرانیاں ہوں

وہی روشنی ہے تحیر تحیر وہی سلسلہ ہے گریباں گریباں

فراقِ نبیؐ کی لطافت نہ پوچھو جنونِ طلب کہ نزاکت نہ پوچھو

مہکتے ہیں کانٹے کھٹکتے ہیں غنچے بیاباں بیاباں گلستاں گلستاں

عجب بیکسی ہے مدد کر خدارا نہ جینے کی صورت نہ مرنے کا یارا

کنارے بھی ہم سے کشیدہ کشیدہ تلاطم بھی ہم سے گریزاں گریزاں

خیالِ رسالت مآبؐ آ رہا ہے دلِ ناتواں پر شباب آ رہا ہے

شبِ غم کی تاریک وادی میں جیسے سحر آ رہی ہے خراماں خراماں

کہیں بادِ صرصر رمیدہ رمیدہ کہیں نکہتِ گل پریدہ پریدہ

تیری جستجو ہے بیاباں بیاباں تری آرزو ہے خیاباں خیاباں

یہی ہے تیری کامیابی کا رستہ اب آیا مدینہ وہ آیا مدینہ

بڑھے جا مسافر دما دم دما دم چلے جا مسافر شتاباں شتاباں

کہاں کے اندھیرے کہاں کے اجالے تجھے دیکھ لیتے ہیں احساس والے

ترا نورِ عارض تجلی تجلی ترا عکسِ گیسو شبستاں شبستاں

کرم کی فراوانیاں اللہ اللہ شفاعت کی ارزانیاں اللہ اللہ

خطاؤں کو پایا شکستہ شکستہ گناہوں کو دیکھا پشیماں پشیماں

وہیں تجھ کو آرام آئے گا قابلؔ وہیں پا سکیں گے سکوں دیدہ و دل

مدینے کی شامیں چراغاں چراغاں مدینے کی صبحیں بہاراں بہاراں