مجھ کو شکستِ دل کا مزا یاد آ گیا

تم کیوں اُداس ہو گئے کیا یاد آ گیا

کہنے کو زندگی تھی بہت مختصر مگر

کچھ یوں بسر ہوئی کہ خدا یاد آ گیا

برسے بغیر ہی جو گھٹا گھر کے کھل گئی

اک بے وفا کا عہدِ وفا یاد آ گیا

واعظ سلام لے کہ چلا میکدے کو میں

فردوسِ گمشدہ کا پتہ یاد آ گیا

مانگیں گے اب دعا کہ اُسے بُھول جائیں ہم

لیکن جو وہ بوقتِ دعا یاد آ گیا

حیرت ہے تم کو دیکھ کے مسجد میں اے خمارؔ

کیا بات ہو گئی جو خدا یاد آ گیا