ہوا زمانہ کہ اُس نے ہم کو نہ بھول کر بھی سلام بھیجا

مزاج پوچھا نہ حال لکھا نہ خط نہ کوئی پیام بھیجا

نہیں ہے توبہ کا اعتبار اب نہیں ہے کچھ دل پہ اختیار اب

بلا رہی ہے ہمیں بہار اب گھٹاؤں نے بھی پیام بھیجا

یہ بے بسی کیسی بے بسی ہے کہ رک سکے وہ نہ تا بہ آخر

نگاہِ غم گیں نے تا بہ آخر پیامِ شوقِ تمام بھیجا

بہارِ امید چھا رہی ہے بہشتِ دل لہلہا رہی ہے

یہ پھول کیوں اُس نے خط میں رکھ کر ہمیں بایں اہتمام بھیجا

نگاہِ اخترؔ نے کہہ دیا کیا کہ جا چھپا ساقیٔ دلارا

نہ بادۂ مشک بو عطا کی نہ ساغرِ لالہ فام بھیجا