خوبصورت ہیں آنکھیں تری رات بھر جاگنا چھوڑ دے

خوبصورت ہیں آنکھیں تری

رات بھر جاگنا چھوڑ دے

خود بخود نیند آ جائے گی

تو مجھے سوچنا چھوڑ دے

تیری آنکھوں سے کلیاں کھلیں

تیرے آنچل سے بادل اڑیں

دیکھ لے جو تری چال کو

مور بھی ناچنا چھوڑ دے

تیری آنکھوں سے چھلکی ہوئی

جو بھی اک بار پی لے اگر

پھر وہ مے خوار اے ساقیا

جام ہی مانگنا چھوڑ دے

اے خوشی ایک پل کو سہی

میں کبھی تجھ سے مل تو سکوں

میرے گھر سے کہاں جائے گی

کچھ تو اپنا پتا چھوڑ دے

زندگی ہے مسلسل سفر

سب کی ہے ایک ہی رہ گزر

ایک ہی جب ہے سب کی ڈگر

کیوں کوئی راستہ چھوڑ دے

میری آنکھوں میں رہتا ہے تو

تیری آنکھوں میں رہتا ہوں میں

صرف محسوس کر لے مجھے

آنکھ سے دیکھنا چھوڑ دے