سلام اس ذاتِ اقدس پر سلام اس فخرِ دوراں پر

ہزاروں جس کے احسانات ہیں دنیائے امکاں پر

سلام اس پر جو آیا رحمت للعالمیں بن کر

پیامِ دوست لے کر صادق الوعد و امیں بن کر

سلام اس پرکہ جس نے بے زبانوں کو زباں بخشی

سلام اس پر کہ جس نے ناتوانوں کو تواں بخشی

سلام اس پر بنایا جس نے دیوانوں کو فرزانہ

مئے حکمت کا چھلکایا جہاں میں جس نے پیمانہ

بڑے چھوٹے میں جس نے اک اخوّت کی بنا ڈالی

زمانے سے تمیزِ بندۂ وآقا مٹا ڈالی

سلام اس پر فقیری میں نہاں تھی جس کی سلطانی

رہا زیرِ قدم جس کے شکوۂ فرّ خاقانی

سلام اس پر جو ہے آسودہ زیرِ گنبدِ خضراء

زمانہ آج بھی ہے جس کے در پر ناصیہ فرسا

سلام اس ذاتِ اقدس پر حیاتِ جاودانی کا

سلام آزادؔ کا آزادؔ کی رنگیں بیانی کا

​سلام اس ذاتِ اقدس پر سلام اس فخرِ دوراں پر