ہجر کی شب یوں مرے نالے صدا دینے لگے

سننے والے رات کٹنے کی دعا دینے لگے

آئیے حالِ دلِ بیمار سنیئے دیکھیئے

کیا کہا زخموں نے کیوں ٹانکے صدا دینے لگے

کس نظر سے آپ نے دیکھا دلِ مجروح کو

زخم جو کچھ بھر چلے تھے پھر ہوا دینے لگے

سننے والے رو دیئے سن کر مریضِ غم کا حال

دیکھنے والے ترس کھا کر دعا دینے لگے

باغباں نے آگ دی جب آشیانے کو مرے

جن پہ تکیہ تھا وہی پتے ہوا دینے لگے

مٹھیوں میں خاک لے کر دوست آئے وقتِ دفن

زندگی بھر کی محبت کا صلہ دینے لگے

سینۂ سوزاں میں ثاقؔب گھٹ رہا ہے وہ دھواں

اُف کروں تو آگ دنیا کی ہوا دینے لگے