موجِ گل موجِ صبا موجِ سحر لگتی ہے

سر سے پا تک وہ سماں ہے کہ نظر لگتی ہے

ہم نے ہر گام پہ سجدوں کے جلائے ہیں چراغ

اب تری راہ گزر راہ گزر لگتی ہے

لمحے لمحے میں بسی ہے تری یادوں کی مہک

آج کی رات تو خوشبو کا سفر لگتی ہے

جل گیا اپنا نشیمن تو کوئی بات نہیں

دیکھنا یہ ہے کہ اب آگ کدھر لگتی ہے

ساری دنیا میں غریبوں کا لہو بہتا ہے

ہر زمیں مجھ کو مرے خون سے تر لگتی ہے

کوئی آسودہ نہیں اہلِ سیاست کے سوا

یہ صدی دشمنِ اربابِ نظر لگتی ہے

واقعہ شہر میں کل تو کوئی ایسا نہ ہوا

یہ تو اخبار کے دفتر کی خبر لگتی ہے

لکھنؤ کیا تری گلیوں کا مقدر تھا یہی

ہر گلی آج تری خاک بسر لگتی ہے