تجلیات تو دیوار و در سے دور نہیں

شبِ سیاہ فروغِ سحر سے دور نہیں

رہینِ منتِ جوشِ نمو ہے خندۂ گل

حیات گرمیٔ خونِ جگر سے دور نہیں

گہر بدوش ازل سے ہے کاوشِ غواص

نہال سعیٔ متاعِ ثمر سے دور نہیں

نہ کیوں ہو روکشِ فردوس اپنا ویرانہ

بہار خندۂ زخمِ جگر سے دور نہیں

ہو نالہ سنج کوئی تو یہاں ہو شورشِ غم

فغانِ نیم شبی تو اثر سے دور نہیں

لگن نہ ہو تو نہ شیشہ گری نہ بت سازی

کمال خواہشِ عرضِ ہنر سے دور نہیں

تضاد ہی سے عبارت ہے شورشِ ہستی

شبِ سیاہ جمالِ سحر سے دور نہیں