تری نگاہ کی ہر جنبشِ حجابانہ

تمام ساغر و صہبا تمام مے خانہ

ترا تبسمِ معصوم شعر و افسانہ

تری نگاہ غزل اور غزل بھی رندانہ

نظر نظر میں کسی سے کسی کا افسانہ

بیاں ہوا ہے سرِ بزم راز دارانہ

قدم قدم پہ مرتب ہوا ہے افسانہ

جہاں جہاں سے گذرتا گیا ہے دیوانہ

نظامِ قلب و نظر اب ہے آئینہ خانہ

کوئی قریب سے گذرا ہے بے حجابانہ

غمِ جہاں تری یادیں نہ چھین لے مجھ سے

انہیں چراغوں سے روشن ہے میراغم خانہ

مرے تصورِ رنگیں میں کوئی یوں آیا

چمن جیسے چلی آئے شامِ مے خانہ

چھٹا ہے ہاتھ سے دامن کسی کا یوں اقبالؔ

لبوں تک آ کے چھلک جائے جیسے پیمانہ