پھر رہِ عشق وہی زادِ سفر مانگے ہے

وقت پھر قلبِ تپاں دیدۂ تر مانگے ہے

سجدے مقبول نہیں بارگہِ ناز میں اب

آستاں حسن کے سجدے نہیں سر مانگے ہے

صرف آنسو نہیں اب حسن کی محفل میں قبول

حسن نذرانۂ طوفانِ شرر مانگے ہے

ہاتھ کو ہاتھ سجھائی نہیں دیتا ہے یہاں

اور شبِ تار اندھیرے سے سحر مانگے ہے

میری دنیا کے تقاضوں ہی پہ موقوف نہیں

دین بھی ایک نیا فکر و نظر مانگے ہے

عشق کو زاویۂ دید بدلنا ہوگا

جلوۂ حسن نیا ذوقِ نظر مانگے ہے

دین و دنیا ہو کہ ہوعشق و ہوس ائے ساغرؔ

ہر کوئی خونِ جگر خونِ جگر مانگے ہے