تو پاس بھی ہو تو دلِ بے قرار اپنا ہے

کہ ہم کو تیرا نہیں انتظار اپنا ہے

ملے کوئی بھی ترا ذکر چھیڑ دیتے ہیں

کہ جیسے سارا جہاں رازدار اپنا ہے

وہ دور ہو تو بجا ترکِ دوستی کا خیال

وہ سامنے ہو تو کب اختیار اپنا ہے

زمانہ بھر کے دکھوں کو لگا لیا دل سے

اس آسرے پہ کہ اک غمگسار اپنا ہے

چراغِ بزم بجھا دے کہ ہو نہ رسوائی

تری نگاہ سے حال آشکار اپنا ہے

ادائے حسن کی اس بے تکلفی کے نثار

کہ جو بھی دیکھے وہ سمجھے کہ یار اپنا ہے

وہ خوش ادا بھی سہی جانِ مدعا بھی سہی

مگر فرازؔ تمہیں اعتبار اپنا ہے